(सेलिब्रेटी नेपाल) ३ चैत्र – कुबेतस्थित नेपाली दूतावासले नेपाली कलाकारको भिसा प्रक्रियामा कडाई गर्ने भएको छ । गृह र संस्कृति मन्त्रालयको सहमति र परराष्ट्रको सिफारिसबिना दूताबासले भिसाका लागि सहयोग नगर्ने भएको हो ।कुबेतमा आयोजना गरिने सांस्कृतिक कार्यक्रममा मदिार पिएर नेपाली-नेपालीबीच नै ‘ग्याङवार’ हुन थालेपछि कलाकारकै भिसा प्रक्रिया कडाई गर्ने दूतावासले निर्णय गरेको खबर छ । ‘रक्सी नखानुहोस्, हुलहुज्जत नगर्नोस भनेर बारम्बार भन्दै आएका थियौं,’ कुबेतका लागि नेपाली राजदूत मधुवन पौडेलले भने, ‘गत साता नेपाली समुदायले आयोजना गरेको कार्यक्रममा यस्तो डरलाग्दो ग्याङफाइट भयो, जसले गर्दा अब आउने कलाकारलाई भिसा प्रक्रियामा सिधै सहयोग नगर्ने निणर्य दूतावासले गरेको छ । सांस्कृतिक कार्यक्रममा रक्सी सेवन गरी दर्शकबीच नै झगडा हुँदा त्यहाँ कार्यरत र नेपालबाट आउने नयाँ कामदारलाई अप्ठेरो पर्ने देखिएको दूतावासले जनाएको छ ।
