काठमाडौं । ‘पूर्ण बहादुरको सारङ्गी’ फेम्ड निर्माता विनोद पौडेलले एक साथ दुईवटा चलचित्र निर्माणको घोषणा गरेका छन् । ‘पूर्ण बहादुरको सारङ्गी’ व्यापारिक रूपमा सफल भएपछि निर्माता पौडेलले आइतबार ‘सक्सेस पार्टी’ आयोजना गर्दै दुईवटा चलचित्र निर्माणको घोषणा गरेका हुन् ।
एक करोड ३० लाखमा निर्माण भएको चलचित्र ‘पूर्ण बहादुरको सारङ्गी’ले नेपाली बक्सअफिसबाट मात्रै करिब ५० करोड रुपैयाँ ग्रसकलेक्सन गरेको छ । करिब ४० करोड ओभरसिज मार्केटबाट कलेक्सन भएको निर्माण टिमले बताएको छ ।
यसको सफलतापछि निर्माता पौडेलले यसको सिक्वेल बनाउने भएका हुन् । उनले ‘पूर्ण बहादुरको सारङ्गी–२’ र ‘रोल नं १’ निर्माण गर्ने घोषणा गरे ।
‘पूर्ण बहादुरको सारङ्गी २’ विसं.२०८२ मा र ‘रोल नं १’२०८३ मा रिलिज गर्ने तयारी छ । चलचित्र ‘रोल नं १’बालमनोविज्ञानमा आधारित रहेर बन्ने बताइएको छ । ‘रोल नं १’ लाई जोन योञ्जनले निर्देशन गर्नेछन् । ‘पूर्ण बहादुरको सारङ्गी २’ कसले निर्देशन गर्नेछन् त्यो भने खुलाइएको छैन ।
