काठमाडौं । माघ १६ गते रिलिज हुने तयारीमा रहेको चलचित्र ‘एक्टर: टेक वन’ को गीत ‘के भरोसा गरम’ सार्वजनिक गरिएको छ । गीतको भिडियोमा प्रदिप खड्कालाई दुई नायिकाहरू आना शर्मा, र दिव्या रायमाझीसँग प्रेममा रहेको देखाइएको छ । यस गीतमा त्रिकोणात्मक प्रेमकथा दर्साइएको छ ।
गीतमा हर्कुलस बस्नेत र इन्दिरा जोशीले आवाज दिएका छन् । उर्मिला गुरुङको शब्द र हर्कुलस बस्नेतको सङ्गीत रहेको गीतमा किरण थापाले कोरियोग्राफी गरेका छन् । कलर ग्रेडिङ राजेन्द्र मोक्तानको रहेको छ ।
चलचित्रको निर्देशन राजन भुसालले गरेका हुन् भने स्क्रिप्ट आकाश बराल र राजन भुसालको सहकार्यमा तयार गरिएको छ । चलचित्रमा प्रदिप, आना, र दिव्याका साथै राजबल्लभ कोइराला, दिव्य देव, उषा रजक, सृजना अधिकारी, र सुशील सिटौला लगायतका कलाकारहरूको प्रमुख भूमिका रहेको छ ।
‘एक्टर: टेक वन’ अधृत फिल्म्स् र मोती फिल्मको संयुक्त ब्यानरमा निर्माण गरिएको हो । यसका निर्माता थमन कुमार भण्डारी, क्रियटिभ निर्माता मोती कार्की, र सह-निर्माता अनीश भुसाल रहेका छन् ।
छायाङ्कन नरेन्द्र मैनालीले गरेका हुन् भने सम्पादन निमेष श्रेष्ठले गरेका छन् । चलचित्रमा हर्कुलस सहित रोहित शाक्य, र एलिस कार्कीले सङ्गीत दिएका छन् ।
