काठमाडौँ। ‘पूजा सर : राजागंज’ को पोस्टर सार्वजनिक गरिएको छ । चैत १ गते रिलिज हुने चलचित्रको पोस्टर सार्वजनिक गरिएको हो । सार्वजनिक पोस्टरमा चलचित्रका मुख्य कलाकार फिचर्ड छन् । दयाहाङ राई, आशा मगराती, विजय बराल र निकिता चाण्डक पोस्टरमा अटाएका छन् । दयाहाङ प्रहरी एसपीको पोशाकमा देखिएका छन् । कुनै घटनाका लागि तयार रहेको प्रहरी टोलीजस्तो देखिएको छ ।
‘पूजा सर: राजागंज’ लाई ‘ह्वाइट सन’ फेम्ड निर्देशक दीपक रौनियारले निर्देशन गरेका हुन् । रौनियार तिनै निर्देशक हुन जसको पछिल्लो रिलिज ‘ह्वाइट सन’को प्रशंसा विश्वविख्यात ब्राजिली लेखक पाउलो कोहेलो समेतले गरेका थिए । यो सिनेमालाई ‘द न्यूयोर्क टाइम्स’ले हेर्नुपर्ने ९ नव निर्देशकको सूचिमा समेत राखेको थियो । सिनेमालाई ‘कबड्डी’ सिरिजका निर्देशक रामबाबु गुरुङले निर्माण गरेका छन् । सिनेमालाई पुलिस थ्रिलरको जनरामा राखिएको छ । सिनेमामा ऋचा शर्मा, पशुपति राई, गौमाया गुरुङ, घनश्याम मिश्रा, आरती मण्डल तथा पुष्पा यादवको पनि अभिनय रहेको छ ।
