काठमाडौं । सिनेमा ‘पूर्ण बहादुरको सारङ्गी’ मा कलाकारहरूको रोचक लाइनअप तयार हुने क्रम जारी छ । अन्तर्राष्ट्रिय रुपमा सिनेमा वितरण गर्दै आएको कम्पनी सेभेन सिज इन्टरटेनमेन्टले निर्माण गर्न लागेको सिनेमाका लागि मुख्य भूमिकामा गायक तथा कलाकार प्रकाश सपूत र मुकुन भुसाल यसअघि नै अनुबन्धित भइसकेका छन् ।
सेभेन सिज सिनेमाको प्रस्तुतिमा बन्न लागेको यो सिनेमामा प्रकाश र मुकुन पछि थप तीन जना कलाकारहरू अनुबन्धित भएका छन् । अभिनयका कारण चिनिँदै आएका कलाकार विनोद न्यौपाने, कलाकार भोला राज सापकोटा र देशभक्त खनाललाई निर्माण पक्षले अनुबन्धित गराएको छ । सिनेमामा उनीहरुको भूमिकाको बारेमा अहिले केही पनि खुलाइएको छैन ।
‘पूर्ण बहादुरको सारङ्गी’मा पनि उनीहरूलाई शीर्ष भूमिका देख्न सकिने निर्माता विनोद पौडेलले जनकारी गराएका छन् ।
सोसल–ड्रामा बन्ने फिल्मका मौलिक कथाको एक गहन विषयलाई उठान गर्न लागेको बताइएको छ । फिल्मका लेखक तथा निर्देशक सरोज पौडेल हुन् ।
जेठको दोस्रो साताबाट छायांकनमा जाने तयारी गरेको सिनेमाको लागि अभिनेता र अन्य कलाकारहरू फाइनल भए पनि निर्माण पक्षले अभिनेत्री र अन्य कलाकारका बारेमा गोप्य राख्न चाहेका छन् ।
सिनेमामा विनोद पौडेल र प्याट्रिक सुवेदीको लगानी रहनेछ । रमेश चौलागाईं र हरि श्रेष्ठ फिल्मका कार्यकारी निर्माता हुन् । महेश दवाडीको पटकथा तथा संवाद रहने सिनेमामा प्रशान्त सिवाकोटीको संगीत रहनेछ ।
