काठमाडौं। अभिनेता दयाहाङ राईको मुख्य भुमिका रहने चलचित्र ‘कार्साङ’मा बुद्धि तामाङ पनि अनुबन्धित भएका छन् । यम शेर्पाको निर्देशनमा निर्माण हुने चलचित्रको छायांकन तिहार लगत्तै हुनेछ ।
यार्सा फिल्मस्को व्यानरमा निर्माण हुने चलचित्रमा बुद्धि तामाङ पनि चलचित्रको मुख्य पात्रको रुपमा भित्रिएको निर्माण टिमले जानकारी दिएको छ । चलचित्रमा पुरुषोत्तम प्रधानको छायांकन रहने छ । चलचित्रको छायांकन सिन्धुपाल्चोक जिल्लाको बाह्रबिसे नगरपालिका र भोटेकोसी गाउँपालिकामा हुनेछ ।
सामाजिक कथामा बन्ने चलचित्रमा अन्य कलाकार तथा प्राविधिक चाँडै फाइनल गरिने निर्देशक शेर्पाले बताए । चलचित्रका बाँकी कलाकार अडिसनमार्फत छनोट गरिने उनले खुलाए । निर्देशक शेर्पाको यो डेब्यू निर्देशकीय चलचित्र हो । उनले यसअघि थुप्रै छोटा सिनेमाको निर्देशन गरिसकेका छन् ।
