काठमाडौँ। अभिनेता दयाहाङ राई र अभिनेत्री प्रकृति श्रेष्ठ अभिनीत फिल्म ‘बिहे पास’को टिजर सार्वजनिक गरिएको छ । बुधवार सार्वजनिक १ मिनेट ३७ सेकेन्ड अवधिको टिजर दयाहाङ र प्रकृतिकै वरिपरि घुमेको छ । प्रवेश पौडेलको निर्देशनमा बनेको यो फिल्म नयाँ वर्षको अवसर पारेर बैशाख १ गतेबाट प्रदर्शनमा आउँदैछ । बिहे गर्नका लागि सरकारी जागिर गर्नुपर्छ भन्ने ग्रामीण नेपाली समाजको मान्यताको कथावस्तु फिल्मले पेस गर्छ ।
सार्वजनिक टिजरमा एउटा मध्यमवर्गीय नेपाली पुरुषको भूमिकामा देखिएका दयाहाङले दुई सपना देखेका छन् । पहिलो– सरकारी अड्डाको महिनावारी तलब र, दोस्रो – जीवनभर असल नारीको साथ ।
अभिनेत्री प्रकृतिसँग दयाहाङको भेट भएपछि आउने उतारचढावको कथामा फिल्म अगाडि बढ्ने टिजरबाट अनुमान लगाउन सकिन्छ । कमेडी र सोसल ड्रामा जनराको फिल्ममा शिशिर वाङदेल, बुद्धि तामाङ, रविन्द्र झा, श्याम राई, विशाल पहारी लगायतको पनि अभिनय छ ।
रोहित कट्टेल प्रस्तुतकर्ता रहेको फिल्मको निर्माता रोजन श्रेष्ठ हुन् । प्रकृति केही वर्षको अन्तरालपछि ‘बिहे पास’मार्फत फिल्मको पर्दामा देखिन लागेकी हुन् । रत्न श्रेष्ठ फिल्मका कार्यकारी निर्माता रहेका छन्।
