आँचलको मुख्य भूमिका रहने ‘नाईं नभन्नु ल ६’ बिहीबारदेखि फ्लोरमा जाने

काठमाडौँ। चलचित्र ‘नाईं नभन्नू ल’ को छैटौँ श्रृंखला ‘नाईं नभन्नू ल ६’ निर्माण हुने भएको छ । यस अगाडि पाँचौँ श्रृंखला सफल निर्माण तथा प्रदर्शन गरेका विकासराज आचार्यले नै ‘नाईं नभन्नू ल’ को निर्माण तथा निर्देशन गर्न लागेका हुन् । प्रेमकथामै सबै श्रृंखला हुँदै आएको ‘नाईं नभन्नु ल’ को छैटौँ श्रृंखला पनि प्रेमकथामा निर्माण हुन लागेको हो । बिहीबारदेखि छायांकन सुरु हुने ‘नाईं नभन्नू ल ६ ’ मा अभिनेत्री आँचल शर्मा र नव अभिनेता आर्शिवाद क्षेत्रीको प्रेम र रोमान्स समेटिनेछ । चलचित्रमा अनुभव रेग्मी सहित केही बालकलाकार समेतको अभिनय रहने निर्माण युनिटले जनाएको छ ।

चलचित्रको कथा निर्देशक आचार्य आफैले लेखेका हुन् । पटकथा तथा संवाद भने उनले सामीप्यराज तिमल्सिनासँग मिलेर तयार पारेका हुन् । पुरुषोत्तम प्रधानको छायांकन रहने ‘नाईँ नभन्नू ल ६’ मा ९ वटा गीत रहनेछ । चलचित्रका गीतमा बसन्त सापकोटा र भुपेन्द्र रायमाझीको संगीत रहनेछ ।