हिट यी फिल्मी गीत : व्यापारमा फाइदा पुर्याउलान् ?


काठमाडौं । प्रदर्शनमा आउने तयारीमा रहेका केही चलचित्रका गीतहरू यतिबेला चर्चामा छन् । रवी ओड र सुनिता कार्कीको स्वर रहेको ‘ए मेरो हजुर’बोलको गीतलाई यतिबेला स्रोता/दर्शकले रुचाइरहेका छन् । यो भदौ ३ गतेबाट प्रदर्शनमा आउने चलचित्र ‘कृष्ण लीला’को गीत हो ।

भदौं १७ गतेबाट प्रदर्शनमा आउने तयारीमा रहेको चलचित्र ‘सम्हालिन्छ कहिले मन’को गीत ‘जरुरी कुरा छ’ पनि चर्चामा छ । अञ्जु पन्त र सुरेश लामाको स्वर रहेको यो गीतले युट्युबमा ५८ लाख बढी भ्युज पाइसकेको छ । टिकटकमा समेत यो गीत हिट बनेको थियो । भदौं १७ मै प्रदर्शनमा आउने अर्को चलचित्र ‘झिंगेदाउ’को ‘आगो बिना बिँडी जल्दैन’ गीत पनि निकै चर्चित बन्यो । शान्तीश्री परियार र प्रविन बेडवालको स्वर रहेको गीतमा लाखौंले टिकटक बनाए । युट्युबमा समेत गीतको भिडियोले राम्रो भ्युज पायो । अन्य चलचित्रका केही गीतहरू समेत स्रोता/दर्शकले रुचाइरहेका छन् ।

चलचित्रको गीत हिट हुँदा व्यापारमा फाइदा पुगेका उदाहरणहरू यसअघि थुप्रै छन् । उसो त, गीत हिट भएर पनि चलचित्र नचलेका उदाहरणहरू पनि नभएका होइनन् । तर, अब ‘ए मेरो हजुर’, ‘जरुरी कुरा छ’, ‘आगो बिना बिँडी जल्दैन’ लगायतका गीतले सम्बन्धित चलचित्रको व्यापारमा फाइदा पुर्याउला/नपुर्याउला ? त्यसका लागि चलचित्रको रिलिज कुर्नुको विकल्प छैन ।