काठमाडौं । सारा श्रीपाइली अभिनित चलचित्र ‘गुञ्जन’को प्रदर्शन मिति तय गरिएको छ । कोभिड महामारीअघि नै छायांकन सम्पन्न भइसकेको चलचित्र आगामी पुस २९ गते प्रदर्शनमा आउने भएको हो । निर्माण युनिटले चलचित्र बितरणका लागि काठमाडौंमा जीजीए ग्रुप र काठमाडौं बाहिर एफडी कम्पनीसम्म सम्झौता गर्दै रिलिज मिति तय गरेको हो ।
सांगीतिक प्रेमकथामा आधारित चलचित्रलाई अष्ट महर्जनले निर्देशन गरेका हुन् । द्धन्द्ध निर्देशक रहेका महर्जनको यो डेब्यु निर्देशकीय चलचित्र हो ।
चलचित्रमा साराका साथमा कबीर खड्का, प्रितमराज सेन्चुरी, सरोज खनाल लगायतको समेत अभिनय छ । प्रितमराजको यो पहिलो चलचित्र हो । हिराकृष्ण शाही र सुनिता शाही चलचित्रको निर्माता हुन् ।
