सेलिब्रेटी नेपाल काठमाडौँ
पुष २८ गतेबाट प्रदर्शनमा आउन लागेको चलचित्र ‘मिस्टर झोले’ टिमले पत्रकार संग भेट घाट कार्यक्रम गर्दै चलचित्रको बारेमा थप जानकारी गरेको छ मंगलबार चलचित्रका निर्माता टेकेन खड्का, नायक दयाहाङ राई,चलचित्रका कार्यकारी निर्माता रौनक बिक्रम कँडेलले चलचित्रको बारेमा थप प्रस्ट पारे
धेरैले ‘कबड्डी’को तेस्रो सिक्वेल भनिरहँदा नायक दयाहाङ राईले ‘मिस्टर झोले’ न ‘झोले’को न त ‘कबड्डी’को नै सिक्वेल भएको बताएका छन् ।
उनी भन्छन्,‘‘मिस्टर झोले’, ‘झोले’भन्दा विल्कुलै फरक छ । तर, बजारमा ‘मिस्टर झोले’, ‘कबड्डी’को तेस्रो सिक्वेल भन्ने जसरी चर्चा चलेको छ त्यो विल्कुलै गलत हो । हो, यस चलचित्रमा प्रायः ‘कबड्डी’को नै टीम छ । त्यसैले कतै ‘मिस्टर झोले’, ‘कबड्डी’को सिक्वेल त होइन भन्ने लाग्न सक्छ । बाहिरको रंग उस्तै लागेपनि ‘मिस्टर झोले’को प्रस्तुती र कथा फरक छ ।’
चलचित्रका निर्माता टेकेन खड्काले ‘मिस्टर झोले’लाई ‘झोले’को सिक्वेल बनाउन चाहेपनि आफ्नो इच्छा अधुरै रहेको बताए । उनी भन्छन्, ‘मेरो चाहना त ‘झोले’को सिक्वेल नै निर्माण गर्ने थियो तर कथा लेख्दै गर्दा बेग्लै बन्न पुग्यो ।’ यस्तै, चलचित्रका कार्यकारी निर्माता रौनक बिक्रम कँडेलले ‘मिस्टर झोले’ पूर्ण मनोरञ्जन दिने शैलीको चलचित्र बनेको दाबी गरे ।
रामबाबु गुरुङ निर्देशित चलचित्र ‘मिस्टर झोले’मा दयाहाङ राई, वर्षा राउत, दीया पुन, प्रविण खतिवडा, वृद्धि तामाङ, पुष्कर गुरुङ, अरुणा कार्की, कमलमणी नेपाल, लक्ष्मी वर्देवा, सरोज अर्याल लगायतका कलाकारहरुको अभिनय छ । यो चलचित्रलाई टेकेन खड्का प्रोडक्सन र सिनेमा आर्टले संयुक्त रुपमा निर्माण गरेको हो ।
