पोखरा। गुरुङ फिल्म एशोसिएसन नेपाल (जिफान) को आयोजनामा तथा नेपाल सरकार, चलचित्र विकास बोर्डको सहकार्यमा पोखरामा सञ्चालित सात दिने अभिनय प्रशिक्षण कार्यशाला सम्पन्न भएको छ।
बैशाख १६ गतेदेखि सुरु भएको कार्यशाला बैशाख २२ गतेसम्म पोखराको नदिपुर–३ स्थित हंशध्वनि थिएटरमा सञ्चालन भएको हो। कार्यशालामा वरिष्ठ रंगकर्मी तथा अभिनय प्रशिक्षक अनुप बरालले प्रशिक्षण दिनुभएको थियो।
कार्यशालामा गुरुङ चलचित्र क्षेत्रका कलाकार, नयाँ पुस्ताका प्रशिक्षार्थी तथा चलचित्रकर्मीहरूको सहभागिता रहेको थियो। अभिनय कला, संवाद अभिव्यक्ति, पात्र निर्माण, रंगमञ्चीय अनुशासन, प्रस्तुति शैली र क्यामेराअगाडि कलाकारले अपनाउनुपर्ने सीपहरूबारे व्यावहारिक प्रशिक्षण दिइएको आयोजकले जनाएको छ।
समापन कार्यक्रममा प्रमुख अतिथिका रूपमा चलचित्र विकास बोर्डका अध्यक्ष दिनेश डीसी सहित वरिष्ठ कलाकार माओत्से गुरुङ, जिफानका सल्लाहकार कृष्ण कुमार गुरुङ , चलचित्र पत्रकार संघ कास्की शाखाका अध्यक्ष सन्तोष वस्याल उपस्थित थिए । अध्यक्ष डिसीले स्थानीय भाषा, संस्कृति र समुदायमा आधारित चलचित्रको विकासका लागि दक्ष जनशक्ति उत्पादन अपरिहार्य रहेको बताउनुभयो। गुरुङ चलचित्रले नेपाली चलचित्र क्षेत्रमा मौलिकता, पहिचान र सांस्कृतिक विविधताको महत्वपूर्ण योगदान दिएको उल्लेख गर्दै उहाँले यस्ता प्रशिक्षण कार्यक्रमले कलाकारको क्षमता अभिवृद्धिमा टेवा पुग्ने विश्वास व्यक्त गरे ।
गुरुङ फिल्म एशोसिएसन नेपालका अध्यक्ष राज बहादुर गुरुङ ‘राजेश’ले कार्यशाला सफलतापूर्वक सम्पन्न हुनु गुरुङ चलचित्र क्षेत्रका लागि उत्साहजनक उपलब्धि भएको बताउनुभयो। उहाँले आगामी दिनमा पनि जिफानले चलचित्रकर्मीहरूको सीप विकास, प्रशिक्षण र संस्थागत सुदृढीकरणका कार्यक्रमलाई निरन्तरता दिने बताए।
कार्यशालाले गुरुङ चलचित्र क्षेत्रका कलाकारहरूमा अभिनयप्रतिको आत्मविश्वास, व्यावसायिक दृष्टिकोण र सिर्जनात्मक क्षमता अभिवृद्धि गर्न महत्वपूर्ण योगदान पुर्याएको सहभागीहरूले बताएका छन्।
