मिस चितवनको ताज सितोष्ना लाई

(सेलिब्रेटी नेपाल) १२ कार्तिक-२० वर्षिया सितोष्ना वन मिस चितवन २०७० बन्न सफल भएकी छिन् । ब्राइट नेपाल डटकमको आयोजनामा चितवनको नारायणगढमा सम्पन्न मिस चितवन २०७० को ताज संगै सितोष्नाले स्कुटर र अन्य विभिन्न पुरस्कारहरु जित्न सफल भएकी छिन् । उनले मिस नेपाल २०७० मा सहभागीता जनाउने अवसर समेत प्राप्त गरेकी छिन्। पूर्व मिस नेपाल सदीक्षा श्रेष्ठले सितोष्नालाई ताज पहिराइदिइन्।

अन्तिम पाँचमा छानिएका प्रतिस्पर्धीलाई आयोजकले सोधे ‘तपाईंको उमेरका नारीलाई अहिलेको समयमा कस्तो चुनौती छ ? उनीहरुको सहयोगका लागि व्यक्तिगत रुपमा तपाईं के गर्न सक्नु हुन्छ ?’यो प्रश्नको जवाफ दिँदै उनले उपाधि जितेकी हुन्। उनले महिला हिंसा, महिलामाथि हुने थिचोमिचो र आलोचना अहिलेको मुख्य समस्या भएको भन्दै यसलाई हटाउन आफू लागि पर्ने बताइन्। यसका लागि जनचेतना जगाउने काममा आफू लाग्ने उनको जवाफ थियो।

अन्तिम पाँचमा सितोष्नासँगै रिदम अधिकारी, पुजा श्रेष्ठ, रक्षा थापा र निशा थापा छानिएका थिए। मिस चितवन २०७० प्रतियोगिताको फष्ट रनर अप पुजा श्रेष्ठ र सेकेण्ड रनरअप रक्षा थापा भइन् ।फस्ट रनरअप पुजाले २५ हजार नगद र सेकेण्ड रनरअप रक्षाले १० हजार नगद सहित विभिन्न उपहार हात पारिन्। २७ जनाबाट तीन चरणपछि १० जना र १० जनाबाट पाँच जना छानिएको थियो।