काठमाडौं । सुदूरपश्चिमको विशिष्ट मौलिक भाका देउडाका अग्रज गायक तथा सर्जक हरिशचन्द्र कडायतको निधन भएको छ । उनको मस्तिष्कघातका कारण बुधबार उपचारका क्रममा निधन भएको हो । केही समयदेखि उनको अस्पतालमा उपचार भईरहेको थियो ।
बझाङ निवासी कडायत लामो समयदेखि देउडा सिर्जना एवं गायनमा सक्रिय थिए । उनको निधनमा देउडा क्षेत्रका कलाकारहरुले दुःख व्यक्त गरेका छन् । पछिल्लो पुस्ताका चर्चित देउडा गायक चक्र बमले गायक एवं सर्जक कडायतको निधनमा दुःख व्यक्त गर्दै लेखेका छन्, ‘देउडा क्षेत्रको एउटा तारा अस्तायो ! उहाँका सृजना कहिले अस्ताउने छैनन । भावपूर्ण श्रद्धाञ्जली ’ ।
देउडा गीतकी चर्चित गायिका रेखा जोशी लगायतले पनि देउडा क्षेत्रको एक हस्ति गुमाएको उल्लेख गर्दै श्रद्धाञ्जली अर्पण गरेका छन् । चर्चित संगीत संयोजक बिनोद बाजुराली कडायतको निधनमा आफूहरुले देउडा गीत संगीतको एउटा सुपरस्टार गुमाएको बताएका छन् ।
